Министерството за транспорт подготвува законски измени за воведување нов електронски систем за наплата на патарините без запирање на автопатите. Според најавите, со новиот модел висината на патарината ќе се пресметува според реално поминатото растојание наместо со плаќање фиксна сума.
Како што објави медиумот 4News, подготовката на законските измени се наоѓа во напредна фаза. Министерот за транспорт Николоски најави дека официјалната презентација на законскиот модел се очекува да се одржи во текот на декември.
Во процесот на подготовка на регулативата се вклучени и експерти од Европската транспортна заедница. Нивната улога е да помогнат во пренесувањето на искуствата и практиките од поразвиените европски држави кои веќе користат вакви модели.
Предвидениот систем треба да функционира без класични физички наплатни рампи. Возилата ќе преминуваат без запирање, додека системот електронски ќе го евидентира растојанието што го поминале.
Според изјавата на Николоски, новиот начин на наплата ќе обезбеди поправеден модел за возачите, бидејќи секој корисник ќе плаќа единствено за реално изминатите километри, за разлика од сегашниот систем со плаќање фиксни износи на поставените рампи.
