Големиот технолошки настан „GITEX AI BELGRADE“, кој ќе се одржи од 25 до 27 мај 2027 година на Белградскиот саем во рамките на Expo 2027, ќе им овозможи на 100 најперспективни стартапи од Југоисточна Европа, вклучително и од Северна Македонија, директен пристап до глобални инвеститори. Преку посебната програма „SEE 100“, избраните македонски и регионални тимови ќе можат да ги претстават своите производи пред меѓународни фондови за ризичен капитал и водечки технолошки компании. Овој настан има за цел да го поврзе регионалниот иновативен екосистем со глобалниот капитал и да создаде нови деловни можности во областа на вештачката интелигенција и технологијата.
Конференцијата и саемскиот дел ги организира „Dubai World Trade Centre“ во соработка со Стопанската комора на Србија како домаќин. Иницијативата „SEE 100“ е наменета за стартапи од Северна Македонија, Србија, Хрватска, Словенија, Босна и Херцеговина, Црна Гора, Албанија, Грција, Бугарија, Романија и Унгарија. Според организаторите, Стопанската комора на Србија ќе ги покрие најголемиот дел од трошоците за учество на стоте избрани регионални компании.
Избраните македонски стартапи ќе имаат можност да ги претстават своите решенија пред повеќе од 5.000 инвеститори од венчур капитал фондови и мрежа што опфаќа речиси 20.000 компании. Како што изјави Питер Брејди, заменик-попотпретседател на „Dubai World Trade Centre“, за медиумот „Netokracija“, регионот се наоѓа во посебен момент на развој: „Југоисточна Европа влегува во својот најбрз инвестициски циклус во цела една генерација. Знаењето е тука, капиталот е тука, се работи на големи национални инфраструктурни проекти и сметаме дека е време српската престолнина да се позиционира на глобалната мапа на настани за вештачка интелигенција токму преку еден ваков настан.“
Покрај изложбениот дел, програмата „SEE 100“ вклучува менторски сесии и специфични работилници со инвеститори наменети за тимови во рана фаза на развој. Брејди исто така посочи дека вештачката интелигенција не треба да се посматра изолирано: „Вештачката интелигенција е технологија со широка примена – гледајте на неа како на инфраструктура.“ Покрај вештачката интелигенција, на настанот ќе учествуваат и компании од областите сајбер безбедност, роботика, облак технологии, финтек и квантно сметање.
Интересот за изложбениот простор е веќе висок, а организаторите потврдуваат дека подготовките се одвиваат со засилено темпо. Брејди истакна: „Со големо задоволство можам да кажам дека веќе сега пополнивме 40% од капацитетот на нашиот експо простор.“ Апликациите за програмата „SEE 100“ се отворени до 27 ноември, а сите заинтересирани стартапи и компании од регионот можат да аплицираат преку официјалната веб-страница на настанот.
