Поддршката од семејството и пријателите е важен дел од секоја трка. А годинава, оние кои се најблиски до учесниците на 22. издание на Виз Ер Скопскиот маратон ќе имаат можност да им испратат порака која ќе ги пречека директно на патеката, токму во моментите кога им е најпотребна дополнителна мотивација.
На 4 октомври, илјадници учесници ќе бидат дел од Виз Ер Скопскиот маратон, а преку иницијативата „Видео секунди за мотивација“, нивните најблиски можат да станат дел од трката на поинаков начин. Тие можат да снимат кратка видео порака во траење од само 7 секунди, со која ќе испратат охрабрување, поддршка и мотивација до својот близок.
Пораката ќе биде прикажана на голем видео-бим на патеката кога учесникот ќе пристигне до Мотивациската Видео Зона. За полумаратонците, тоа ќе биде на 18-тиот километар, додека за маратонците видео пораките ќе се прикажуваат на 39-тиот километар.
Токму во овие делови од трката заморот е сè поголем, а неколку зборови од најблиските можат да донесат дополнителна енергија и поттик за продолжување кон целта.
Пораката може да биде едноставна – неколку зборови за охрабрување, мотивација или поддршка. Потребно е да се сними видео со звук во траење од 7 секунди, во хоризонтален формат, а пред испраќањето да се прочитаат условите за прифаќање на видеата.
За испраќање на видео пораката потребно е да се знае стартниот број на учесникот за кого е наменета. По прикачувањето и испраќањето на видеото, пораката ќе биде прикажана на видео-бимот кога учесникот ќе стигне до соодветната точка на патеката.
Мотивациската Видео Зона се реализира со поддршка на Македонски Телеком, технолошки партнер на Скопскиот маратон, кој преку голем LED дисплеј овозможува видео пораките од најблиските да стигнат до учесниците во вистинскиот момент.
На овој начин, и оние кои нема да бидат на патеката можат да бидат дел од Виз Ер Скопскиот маратон и да му дадат дополнителна мотивација на својот близок на патот кон целта.
Седум секунди од вас. Голем поттик за вашиот близок.
Снимете порака и испратете видео на следниот линк: https://services.tagtiming.mk/mk/v/wizz-air-skopje-marathon-2026
