Проектот „Balkan Entrepreneur Bridge“, кој го реализира Унијата на млади претприемачи на Македонија (Phoenix Rising), беше успешно претставен на престижната „2026 Acceleration Week for Global Youth Development Programs“, што се одржа во Шангај и Вухан, Кина.
По покана на кинеската организација – партнер на Унијата, за учество беше номиниран проектниот менаџер Никола Ветаџока, кој ја претставуваше Македонија и регионалниот проект „Balkan Entrepreneur Bridge“ пред повеќе од 500 претставници од целиот свет. Настанот ги собра водечките младински организации, иновативни проекти, институции и претприемачи со цел размена на искуства, градење партнерства и промоција на успешни иницијативи за младински развој.
За време на презентациите беа претставени бројни проекти од различни области, а „Balkan Entrepreneur Bridge“ беше препознаен како една од најинтересните и најиновативните иницијативи, благодарение на својот уникатен концепт кој ги поврзува младите претприемачи од земјите на Западен Балкан преку регионална соработка, вмрежување, размена на знаење и меѓусекторски партнерства.
Проектот, кој веќе трета година успешно ги поврзува младите претприемачи од регионот, претставува пример како преку претприемништвото може да се создаваат нови можности за економски развој, меѓусебна доверба и долгорочна регионална соработка.
„За нас ова претставува големо признание. Особено нè радува што проект создаден во Македонија беше препознаен и високо оценет во конкуренција на иницијативи од целиот свет. Тоа е потврда дека квалитетните идеи немаат граници и дека регионот има што да понуди на глобалната сцена“, велат од Унијата на млади претприемачи на Македонија.
Учеството на конференцијата отвори можности за воспоставување нови меѓународни партнерства и соработка со организации, институции и претприемачки екосистеми од различни делови на светот, што ќе придонесе за понатамошен развој на проектот и нови можности за младите претприемачи од Западен Балкан.
The post Македонски проект меѓу највпечатливите на светска конференција во Кина appeared first on Marketing365.
