Во свет каде што лидерството често се продава како титула, а успехот како добро спакувана илузија, ретко кој зборува за вистинската цена која се плаќа: притисокот, осаменоста, нападите, предавствата – и борбата да останеш свој. Во таквиот свет постојат и луѓе кои едноставно не можат да се вклопат во туѓи рамки. Не затоа што не умеат -туку затоа што се создадени да водат поинаку.
Тања Милисковиќ Митиќ не е класичен корпоративен производ. Таа е исклучок. И тоа по избор. Жена што управувала со системи од половина милијарда евра, илјадници вработени и комплексни операции на неколку локации. Но уште поважно – жена што одбила да ја плати цената што многумина тивко ја плаќаат за да останат „прифатени“.
Нејзината приказна не е приказна за удобен успех. Туку за интегритет. За моќ. За падови и победи. За трансформација. По години поминати во врвен менаџмент во голем интернационален систем, денес гради нешто свое – без компромиси, без маски и без потреба да биде „допадлива“.
Ова не е интервју за кариера. Ова е интервју за изборот никогаш да не дозволиш други да те дефинираат и стават во рамка.
Маркетинг365: Јавноста ве препознава по лидерската улога во голем систем. Каков беше вашиот пат – без филтер?
Тања Милисковиќ Митиќ: Мојот пат не беше класична „инспиративна приказна“. Беше пат што мораше да се изоди, преживее и да се надмине.
Никогаш не сум била импресионирана од титули. Титулите се привремени. Резултатите остануваат. Мојот труд и успеси зборуваат сами за себе. Резултатите што ги оставив зад себе се неизбришливи. Успеав да одолеам на систем кој постојано ме тестираше на секое поле и горда сум што издржав и покажав дека постои поинаков, поисправен пат на делување и покрај континуираниот притисок врз моите професионални и лични граници,
Не постојат многу луѓе во регионот што управувале со системи со приходи од половина милијарда евра, над 10.000 вработени, повеќе производствени капацитети и неколку менаџерски структури истовремено. Јас не наследив систем. Јас градев. Од нула. На повеќе локации. Под огромен притисок.
За мене лидерството никогаш не било прашање на позиција. Туку прашање на влијание. Лидерството не е колку луѓе зависат од тебе. Лидерството е колку луѓе остануваат стабилни (променети, прилагодени или вратени кон сопствената природа, не е важно) кога тебе те нема. Тој систем и денес функционира, на различен начин, меѓутоа со лидерите кои јас сум ги идентификувала, менторирала и развила. Мојата кариера никогаш не беше правило. Како ни мојот живот. И никогаш не сакав да биде. Јас сум исклучок, по избор
Маркетинг365: Што значи лидерство на тоа ниво — вистински?
Тања Милисковиќ Митиќ: Лидерство не е мотивациски говор. Лидерство е да носиш одлуки кога нема добар избор. Во големи системи, довербата не е емоција. Таа е договор. Понекогаш и избор на помало зло.
Луѓето не се „твои“. Тимот не е семејство. Тимот е група луѓе што работат со тебе додека тоа има смисла за нив. Вие никогаш не можете да знаете каква вистински е нечија природа и карактер, се додека вие одлучувате за нивната кариера, позиција, плата, иднина. Тоа не е цинично. Тоа е зрелост и реалност што многумина ја игнорираат — на сопствена штета. И јас тоа го правев долго време свесно, меѓутоа тој принцип не е одржлив.
Моќта ги менува луѓето. Тоа го видов многу рано. И научив дека карактерот на човекот најдобро се гледа кога неговиот интерес ќе се судри со неговите вредности.
На тоа ниво, лидерството бара интелигенција, дисциплина и огромна емоционална контрола. Бара да останеш смирен додека сите други реагираат импулсивно.
Да носиш тежина без потреба да демонстрираш сила. Да бидеш стабилен дури и кога се околу се распаѓа. Довербата не се гради со допадливост. Се гради со конзистентност. Со интегритет. Со јасност.
Луѓето треба точно да знаат кој си кога ќе влезеш во просторија. И што никогаш нема да направиш. Тоа е лидерство.
Маркетинг365: Како е да се биде жена на врв?
Тања Милисковиќ Митиќ: Тешко е затоа што од жените се очекува да трпат. Да носат туѓи грешки со насмевка. Да молчат. Да се срамат или извинуваат за туѓо несоодветно однесување. Да се намалуваат за другите да се чувствуваат поголеми.
Во еден момент сфатив нешто што многу луѓе во корпорациите никогаш нема да го кажат гласно: понекогаш цената за следната позиција, не е работата што си ја сработел — туку колку си подготвен да молчиш, да гледаш на друга страна и да играш по туѓи правила.
Јас одбив. Наместо да молчам, проговорив. Наместо да се вклопам, го прекршив кодот. Наместо да прифатам, се спротивставив. Во оваа држава многу луѓе гласно зборуваат за патриотизам, градење на лидери, владеење на право, заедништво и вредности — сè додека застанувањето зад еден човек не почне да ги чини нешто лично.
Истото го видов и кај дел од „влијателните“ луѓе во бизнисот, политиката, медиумите и јавниот живот. Приватно некои и покажуваа поддршка. Јавно молчеа. Не сакаа да ризикуваат интереси, позиции или односи.
Во најмоќните глобални случаи денес, ќе видите иста шема: Жените се тие што се распарчуваат јавно. Моќните мажи остануваат моќни.
Истото го гледаме и тука. Во политика, бизнис, медиуми – кога доаѓа време за последици, најчесто ги носат жените. Јас тоа никогаш не го прифатив. И да – платив цена.
И денес се соочувам со напади, дискредитации, закани и обиди за бришење на сè што сум изградила. Но резултатите не можат да се избришат.
Ниту луѓето што знаат како сум работела, иако не смеат денес ни името да ми го спомнат.
Како и да е, жените не треба да се извинуваат за туѓи постапки. Не треба да бидат „помеки“ за да бидат прифатени. Јас влегов во битка за која многумина ми рекоа дека не можам да ја добијам. Но денес исходот веќе не ми е ни важен. Затоа што јас победив во најважното: не дозволив да ме скршат и среќна сум, избрав живот во кој се чувствувам убаво и слободно.
Луѓето многу лесно исчезнуваат кога ќе исчезне титулата. Малкумина остануваат кога повеќе немаат корист од вас. И тоа е во ред. Тоа е животот.
Но токму во тие моменти човек открива кој навистина е и со што бил опкружен.
И да бидам искрена – тоа беше моментот кога засекогаш престанав да имам илузии и за луѓето и за корпоративниот свет. Јас ако ништо друго, успеав во едно нешто – барем направив да биде доволно непријатно за следниот пат некој двапати да размисли пред да се обиде истото со некоја друга жена.
Во период кога и професионално и лично бев на раб, сфатив нешто што денес го живеам како правило: Не е прашање колку е тешко. Прашање е што ќе изградиш од тоа.
Во тие моменти не видов многу заштита – ниту како лидер, ниту како жена, ниту како бремена жена, ниту како мајка, ниту пак како граѓанин на оваа држава.
Системите навистина најмногу ги штитат големите, моќните и “важните”. Но видов нешто многу важно: Колку човек станува силен кога веќе нема што да изгуби освен сопственото достоинство. Тоа е ослободувачки, бидејќи повеќе не ви треба ничие одобрение.
И колку треба човек да биде благодарен за ретките, вистински луѓе.
Еден од оние што избра да застане на страна на вистинските вредности, беше Борис Ефтимовски, од Маркетинг 365. Откако ја слушна мојата приказна, ми рече: „Интегритетот и храброста што ги рефлектираш мора да ги направиме заразни за целата наша заедница.“ И не остана само на збор, туку без да калкулира, даде простор да ја раскажам приказната за да можеби послужи некому како лекција да не ја направи истата грешка. Мојот пример докажува дека секогаш можеме повеќе од што мислиме, и да направиме, и да издржиме, и да преживееме.
Маркетинг365:Кои се најбруталните лекции што ги научивте?
Тања Милисковиќ Митиќ: Прво, Компетентноста не е доволна. Резултатите не ве штитат.
Ако не се заштитите самите – никој нема.
Јас некогаш верував дека ако сте најдобри во тоа што го работите, никој нема да може да ве допре.Тоа беше наивно. Вие бидете попаметни, заштитете се. Второ, системите знаат да бидат исклучително сурови и валкани кога ќе кажете „не“, кога ќе престанете да бидете корисни или кога ќе одбиете да играте нечиста игра. Затоа никогаш не потпишувајте договор без сериозна заштита.
Трето, нашите институции и понатаму многу полесно ја разбираат моќта отколку човекот. Судовите и натаму бараат судска пракса за случаи кои се преседани. Четврто, можеби најважната лекција: Не се потпирај на никого освен на себе и своето семејство. Повеќето луѓе носат маски. И тоа е во ред. Ние не сме тука да ги разобличуваме. Тука сме да испорачаме резултат. Луѓе што со години ми беа блиску – исчезнаа. Немаа повеќе корист.
Многумина се плашеа од „скандал“. Други се плашеа од моќта на системот. Трети едноставно не сакаа да ризикуваат ништо свое. И петто, што и да ви се случува, запамтете дека стабилноста не доаѓа од околностите. Туку од внатрешната поставеност на човекот. Некој паметен рекол: “кој владее со силата на својата суштина, тој истрајува на своето место и него го опкружуваат сите ѕвезди“. Според мене, единствен пораз е само откажувањето од сопствените принципи, се друго е лекција.
Маркетинг365: Зошто заминавте и започнавте свое?
Тања Милисковиќ Митиќ: Затоа што дојде момент кога повеќе не можев да барам од луѓето нешто во што ни самата не верував. Сфатив дека не сум во средина што е усогласена со моите вредности.
Сакав сама да одлучувам: каде ја вложувам својата енергија, со кого работам, зад што стојам, и што никогаш нема да толерирам. BeeConsulting не беше создадена во совршен момент. Напротив.
Настана во најтешкиот период од мојот живот: бремена, под огромен притисок, во правна и лична битка со многу помоќен противник. И токму тогаш сфатив нешто многу едноставно:
Можам да издржам многу повеќе отколку што некогаш сум мислела.
Таа транзиција беше избор и одлука никогаш повеќе да не дозволам околностите или туѓите игри да ме дефинираат. Во тој период научив нешто што денес го живеам како правило: „Ние не сме она (најлошото) што ни се случило. Ние сме она што ќе одлучиме да станеме после тоа“.
Маркетинг365: Што правите денес – и по што сте различни?
Тања Милисковиќ Митиќ: Градам системи што функционираат. Или не работам.
BeeConsulting работи со компании и лидери што се подготвени за вистинска трансформација, не за козметички промени и корпоративен театар. Мојот пристап е директен и практичен, базиран на реално искуство од системи што повеќето луѓе никогаш нема да ги водат.
Работам со луѓе што сакаат вистина, не комплименти. И не сум тука за „фино друштво за сликање“. Тука сум да создадам резултати што остануваат и после мене.
Верувам дека компаниите имаат обврска да создаваат вредност не само за сопствениците – туку и за луѓето, за семејствата и за општеството. Ако создадеме критична маса на луѓе со здрав мајндсет, интегритет и способност – можеби конечно ќе почнеме да се движиме напред како општество.
Тоа е потежок пат. Но јас никогаш не сум била личност што избира лесен пат. И да бидам искрена – веројатно токму затоа луѓето ме паметат.
Денес сум заинтересирана за проекти кои се специфични, или за кои другите мислат дека се „невозможни“ и за компании што имаат вистинско влијание, јасни вредности и храброст да направат разлика – во индустријата, во општеството и во животите на луѓето. Не ме интересира само позиција.
Ме интересира смисла. Влијание. Наследство. Позитивна пронена.
Маркетинг365:Што значи успех денес за вас?
Тања Милисковиќ Митиќ: Лично – Мир. Здраво, сложно и стабилно семејство. Мојот син Богдан.
Живот од којшто не ми треба бегство или одмор. Денес повеќе од било кога верувам во едноставна филозофија:
Live. Strive. With passion, humor and style. Бидејќи животот е премногу краток за да се живее без страст, без смеа и без сопствен автентичен печат.
Професионално?
Резултати што остануваат. Луѓе што растат. Системи што функционираат и без тебе и додаваат вредност за многу луѓе. И уште нешто што порано го потценував:
Да можеш да кажеш „не“ на исцрпеност, експлоатација и безобѕирност – без чувство на вина.
Со текот на времето сфатив дека најголем успех е слободата свесно да избираш колку и во што ќе вложиш енергија бидејќи времето сепак е најскапа валута.
Маркетинг365: Вашата порака до луѓето пред голема промена?
Тања Милисковиќ Митиќ: Не плашете се, стравит е илузија. Верувајте, бидејќи се поминува. Не постои совршен момент. Постои само моментот кога ќе одлучиш дека повеќе не сакаш да живееш туѓ живот и сакаш слободно да дишеш. Секој човек носи повеќе од една приказна во себе.
Прашањето е: која ќе избере да ја живее?
Никој нема право да ве дефинира. Не се врзувајте за туѓите очекувања. Користете ги како скала. Не како граница. Никој не може да знае што е најдобро за вас, знаете само вие самите, затоа сакајте ги своите оштетувања и уникатност. Таму ви е силата.
Како што напишал Tupac во една песна: “Did you hear about the rose that grew from a crack in the concrete?”
Некои луѓе стануваат најсилни токму затоа што никогаш не растеле во совршени услови.
И запомнете:
Подобро е да жалите за нешто што сте го направиле, отколку за нешто што никогаш не сте се осмелиле да го направите.
Ако не можете да решите проблем – тогаш играте по туѓи правила. Не барајте пофалба. Барајте критика. Бидете нежни кон себе, но задржете високи стандарди.
Не чекајте „следна“ можност. Оваа што ја имате – е таа.
Секој може со труд и малку среќа да постигне успех и се што што ќе посака, меѓутоа поважно е каков човек ќе биде низ тој процес, и токму тука започнува вистинското лидерство.
The post ИНТЕРВЈУ со Тања Милисковиќ Митиќ од BeeConsulting „Не сум создадена да играм по туѓи правила.“ appeared first on Marketing365.
