Пишува: Магдалена Шамбевска Аневска, директор за маркетинг и продажба во Nova Solutions
Гледајќи документарец за вештачката интелигенција на телевизија и читајќи содржини на оваа тема која сите нè фасцинира, се инспирирав да го напишам овој текст и да споделам како AI ја менува играта во светот на маркетингот.
Пред да ве воведам во тоа како вештачката интелигенција моментално и во иднина ќе влијае не само на маркетингот, туку и на сите гранки и нашето секојдневие, најпрво сакам да се запознаеме со нејзиното значење.
Некогаш дел од научната фантастика, а денес се користи од милијарди луѓе. Иако нема прецизна дефиниција, општо е прифатено дека AI е всушност употреба на компјутери за имитирање на човечката интелигенција. Денес, таа се користи во речиси секоја индустрија, често на начини кои се премногу суптилни за да се забележат.
Во продолжение се три категории на вештачка интелигенција:
Тесна AI: Создадена за многу специфични задачи, како што се играње игра, одржување на спам надвор од вашето сандаче, помагање да најдете ресторан во близина со вашиот смартфон, или дури и возење на вашиот автомобил.
Општа AI: Со поголема сличност на човечките способности, општата вештачка интелигенција е понапредна форма која вклучува визуелна и јазична обработка, контекстуално разбирање и способност за адаптација на широк спектар на задачи. Се смета дека е далеку во иднината.
Супер AI: Замислете машина која е попаметна од вас – многу попаметна. Суперинтелигенцијата е сè уште само теорија, но напредокот во AI поттикнува интересни и загрижувачки прашања за иднината на човештвото.
Сакате да знаете како е развиена? Одговорот следува. Таа е развиена врз основа на четири сегменти.
Машинско учење
Машинското учење е техника преку која програмите на AI се обучуваат.
Идејата зад машинското учење користење на примероци од податоци за обучување на компјутерските програми да препознаваат шаблони врз основа на алгоритми. Машинското учење овозможува компјутерите да извршуваат задачи без да бидат програмирани за тоа. Овде, ефикасноста на машинското учење генерално зависи од алгоритмот.
Невронски мрежи
Невронските мрежи се компјутерски системи дизајнирани да ги имитираат невроните во мозокот. Овие мрежи учат преку обработка на примери, користејќи познати влезови и предвидени резултати. Како што мрежата стекнува искуство, нејзиниот излез се приближува до целниот резултат.
Обработка на природен јазик
Обработката на природен јазик е гранка на AI која вклучува способност на компјутерите да разберат говорен јазик и текст. Ова вклучува повеќе од проста аудио-текст (и обратно) транслација. Една од целите е дизајн на компјутер кој целосно разбира и анализира документи.
Роботика
Употребата на роботи датира со стотици години наназад, но машините кои можат да асистираат без човечко вмешување се релативно нови. Првиот автономен робот беше инсталиран во 1961 година за подигање на жешки метални парчиња од машина. Оттогаш, роботите станаа многу почести и се користат во широк спектар на апликации, од истражување на вселената до чистење на вашиот тепих.
Сега, во светот на маркетингот, вештачката интелигенција (AI) нуди револуционерни решенија за подобрување на прецизноста и ефикасноста на рекламните кампањи. Замислете свет во кој секоја реклама што ја гледате е направена специјално за вас, како лична порака од вашиот омилен бренд. Вештачката интелигенција сега го прави тоа можно, овозможувајќи рекламите да бидат хиперперсонализирани и таргетирани директно кон секое лице поединечно. Звучи неверојатно, нели?
Тоа ќе биде – хиперперсонализирано директно видео – таргетирање, што значи дека истата реклама нема да се пласира на сите. Одредени рекламни кампањи веќе започнаа да собираат предвремени геоподатоци. Тоа значи дека корисниците виделе различни содржини на верзии на еден клип или реклама во зависност од подрачјето во кое живеат. Но огласувачите знаат за нас многу повеќе отколку што претпоставуваме.
Па така, одредени AI генератори може да ви се обратaт на следен начин: Здраво, Магдалена. Како сте? Се прашувате од каде знам која сте?
Помислете, можеби при гледање на одредени филмови, симнување на апликации и слично, вие употребувавте кориснички податоци како што е вашето име, или можеби последно купувавте онлајн преку интернет, карта за концерт или кино.
“Барби”. Тоа е последниот филм кој го гледавте на кино, зарем не? Го знаеме и вашиот број на седиште. Ова делува прилично морничаво, ако мене ме прашувате, но наскоро би можело да стане стандардна пракса. Замислете, вештачката интелигенција може да овозможува на познатите личности течно да зборуваат на различни јазици. Што порано не беше случај.
Во рекламна кампања направена со вештачка интелигенција, за мегаѕвездата Лајонел Меси, тој ги повикува навивачите заедно да гледаат фудбал. Истовремено им се обраќа на навивачите по име, така што секој може да ја добие “Месиевата порака”. Замислата е многу едноставна. Колку пораките се повеќе персонализирани, толку ќе бидат поуспешни. Зошто е тоа така?
Кога позната личност го изговара вашето име, специфично, тоа некако ги возбудува луѓето, па во нив се јавува желба да го споделат тоа, да се забавуваат користејќи ја таа порака.
Луѓето сакаат да се пронајдат во рекламата, но не изгледа секој како личностите кои обично ги гледаме во рекламите. Затоа, модните агенции сѐ почесто ја прифаќаат разноликоста. Моделите сега ги има во сите облици, возрасти, бои и величини. Дури и луѓето со инвалидитет се повеќе и повеќе ангажирани. Меѓутоа, ангажирањето на толку различни луѓе, скапо ги чини компаниите. Затоа се впуштија во нов начин на реализација на кампањите. Тоа го отвори патот на агенциите да користат манекени со вештачка интелигенција. Тие се поефтини и доволно разнолики. Замислете, модната агенција “La La Land” од Амстердам, крена револуција во модната индустрија. Нивните манекени не се вистински луѓе. Што значи, нема да ги видите како шетаат по модната писта. Тие се всушност генерирани со вештачка интелигенција. Основачот на таа агенција – Мајкл Мусанда, го согледа ова како потреба на пазарот за која реално има простор и може да се имплементира.
Оваа агенција ги согледува болните точки на купувачите, а тоа е непостоење на модели кои личат на Вас. Ако сакате да ја предвидите иднината, најдобро е сами да ја креирате, а кога нештата се гледаат од тој агол , целта е поостварлива.
Облеката сѐ почесто се продава по пат на интернет. Согласно на тоа, за можат луѓето кои купуваат од дома да имаат подобра претстава за тоа како одредено парче облека ќе им стои, онлајн моделите ќе бидат достапни во секоја величина, возраст и боја на кожа. Ова е исплатлив начин за брендовите да одржат разноликост преку вештачки генерирани модели. Вака, моделите освен што изгледаат одлично, паралелно може да прават и повеќе работи. Едноставно речено, можностите се бесконечни. Може да ги прикажете како летаат, танцуваат на вулкан, како пливаат под вода, може дури да ги сместите и на друга планета. Нели е ова фасцинантно?
Ова е една од причините заради кои верувам дека сите AI модели ќе станат многу популарни во рекламирањето. Тие ќе имаат огромен потенцијал дури и за разговарање со потрошувачите на специфичен и уверлив начин, бидејќи може да изгледат многу слично на потрошувачот или на блиските пријатели или членови од семејството. Но сепак, добро е предвремено компаниите да се предупредат дека заради новите трендови, потрошувачите може да ја изгубат довербата или ќе се чувствуваат фрустрирано и несигурно за автентичноста на таа слика, видео снимка или глас.
Скоро ќе биде и невозможно да разликувате што е стварност а што е лага, барем за просечниот потрошувач кога станува збор. Вистина или лага? Ова ќе биде прашањето што сѐ почесто секој од нас ќе си го поставува кога ќе пребарува на Интернет.
Во иднина ќе се појави уште една технологија која ќе презентира проширена реалност. Веќе ја има, се користи, но во многу мал процент. Големи компании од светот, снимија реклами со помош на вештачка интелигенција на која и испраќаат сценарио за тоа како сакаат видеото да изгледа. А резултатот е вчудовидувачки. Повеќе од добро и реално изгледаат.
Верувам, уште од одамна сте ги испробале апликациите за мебел, каде некое парче мебел ви се допаднало и сакате да се уверите дали и во вашиот дом ќе изгледа исто како во изложбениот салон? Сте пробале да видите кои наочари подобро ви стојат? Ваквиот тип на проширена реалност или апликации од овој тип, на корисниците им овозможуваат да ги тестираат предметите пред да ги купат од интернет. Тие се почесто се користат во рекламирањето.
Минатата година, потрошувачката за користење на апликации од овој тип се удвоила, а заработката е проценета на 3.2 милиони евра. Овие апликации отворија врата на еден нов вид на купување. Сега целта е нешто сами вие да пробате, без продавачите да се обидат да ви продадат. Ако нештото ви се допадне и мислите дека тоа добро ќе ви дојде тогаш купете го. Така да, ова освен што го подобрува процесот на маркетиншкиот и рекламниот процес, им овозможува на луѓето без брзање и притисок да донесат одлука.
За користење на овие холограмски апликации потребен ни е само смарт телефон. Тоа е така бидејќи овие апликации работат со филтри како оние на SnapChat или Instagram. Секој што сака да го преуреди домот може лесно да го направи тоа. Со својот телефон треба само да ја скенира собата. Апликацијата потоа сама го мери просторот, препознава истакнати карактеристики како прозорци, врати. Потоа генерира 3Д модел.
Технологијата овозможува прецизно пратење на движењата на телефонот, па го поставува мебелот точно таму каде што вие сакате. Мебелот може со помош на прсти да го движите низ собата. Но, оваа технологија иако сеуште е во развој, таа во иднина ќе го промени начинот на кој луѓето ќе гледаат на маркетингот и рекламирањето. Нема да добивате спам на меил, телефонски повици или пораки. Тоа ќе биде споено. Меѓутоа, задачата од која сите се плашиме, е носењето на нов мебел по скали, кој сеуште останува како реалност. Но, во едно можете да бидете сигурни . Новата фотелја ќе се вклопи. 🙂
Персонализираното рекламирање базирано на вештачка интелигенција и проширена реалност има огромен потенцијал за огласувачите. Но, кога алгоритмот премногу добро го предвидува вашиот интерес, сигурно ќе се запрашате, дали тој премногу знае. Што мислите? Дали ви се допаѓа хиперперсонализираното рекламирање?
Навлегувам подлабоко и ве внесувам во светот каде AI освен за маркетингот како гранка од промотивните начини, наоѓа примена и во други области.
Помислете технологијата не само што ги олеснува нашите животи, туку и ги подобрува на начини кои некогаш само ги замислувавме. Оваа возбудлива приказна започнува во 1950-тите години, кога брилијантниот Алан Тјуринг го предложи својот познат Тјуринг тест, кој има за цел да ја измери способноста на машина да покаже интелигентно однесување еквивалентно на човек. Од тогаш, AI еволуираше драматично, од основни алгоритми и правила до напредни модели на машинско учење и длабоко учење.
Тесната AI (Narrow AI) се користи секојдневно за специфични задачи, како што се гласовни асистенти (на пример, Сири или Алекса), системи за препораки на Netflix или Spotify, и автономни возила. Од друга страна, општата AI (General AI) е целта кон која се стремат многу научници и инженери, но е сè уште е далеку од реализација.
Освен во маркетингот, AI има големо влијание и во здравството, каде што помага во дијагностицирање на болести, анализирање на медицински податоци па дури и во креирање на нови лекови. Во финансиите, AI се користи за детектирање на измами и оптимизација на инвестиции, додека во транспортот, автономните возила се едни од најголемите достигнувања.
Предностите на AI се многубројни, вклучувајќи ја можноста за обработка на големи количини на податоци со голема брзина и прецизност, што води кон подобрување на ефикасноста и продуктивноста. Сепак, AI носи и предизвици, како што се етички прашања, загриженост за приватноста и безбедноста на податоците, и потенцијалот за автоматизација на работни места што може да доведе до губење на работни позиции.
AI продолжува да се развива со неверојатна брзина. Во иднина, се очекува AI да стане уште поприсутен во нашите животи, со нови технологии кои ќе ги подобрат нашите секојдневни активности, ќе го подобрат здравството, образованието, и ќе донесат нови можности за бизнисите. Сепак, важно е да се продолжи со разгледување на етичките импликации и да се обезбеди дека AI ќе биде користен за добробит на сите.
Во замислениот свет на AI, важно е да го истражиме неговиот потенцијал и да гарантираме дека ќе се користи за добробит на човечеството. Иако AI може да помогне во многу аспекти на животот, неговата способност да го замени човековиот осет и емоции е многу ограничена и не може да ја замени човечката врска и емпатија. Па морам да споделам дека мене лично, поубаво ми е кога комуницирам со луѓе наместо со машини, но го почитувам напредокот и сакам да растам и да се развивам согласно последните трендови. А вие?
The post Колумна на Магдалена Шамбевска Аневска: Вештачката интелигенција (AI) во светот на маркетингот! appeared first on Marketing365.
