Повеќе од една четвртина од граѓаните во Македонија размислуваат за заминување од земјата, главно поттикнати од високите животни трошоци и ниските примања, иако истовремено чувствуваат повисоко ниво на безбедност од регионалниот просек. Ова го покажуваат податоците од истражувањето „SecuriMeter“ на Советот за регионална соработка, кои ги објави порталот 4News.
Според наодите од истражувањето, вкупно 26,1 отсто од испитаниците во Македонија размислуваат за заминување во странство. Од нив, 14,2 проценти имаат неодреден план, 6,2 проценти формирале конкретна намера, додека 5,7 отсто веќе преземаат директни чекори за преселување. Наспроти нив, 68,1 процент навеле дека воопшто не планираат да ја напуштат државата. Иако вкупниот процент на оние што размислуваат за заминување е под регионалниот просек од 29,3 отсто, земјата е меѓу водечките во Западен Балкан според процентот на лица кои веќе преземаат активни чекори, веднаш зад Босна и Херцеговина и Албанија.
Желбата за заминување е особено застапена кај младата популација. На регионално ниво, дури 58,1 отсто од младите на возраст меѓу 18 и 24 години размислуваат за живот или работа во странство, при што речиси 29 проценти од нив имаат разработен план или прават конкретни чекори кон реализација. Во Македонија, прашањето на депопулацијата и иселувањето се перципира како исклучително сериозен проблем од страна на 80,1 отсто од населението, што претставува една од најголемите општествени грижи.
Финансиските притисоци остануваат главниот фактор што влијае врз ваквите размислувања. Инфлацијата и трошоците за живот загрижуваат дури 93,8 проценти од граѓаните, додека состојбата со работните места и платите е извор на грижа за 81,7 отсто од испитаниците. Дополнителна илустрација за ранливоста на домаќинствата е податокот дека само 31,7 отсто од семејствата можат самостојно да поднесат неочекуван трошок од илјада евра без да позајмат пари или да побараат надворешна помош.
Истовремено, економската несигурност се одвива паралелно со релативно високо чувство на општа и лична безбедност. Вкупно 62 отсто од граѓаните ја сметаат Македонија за безбедно место за живеење, што е повеќе од просекот на Западен Балкан кој изнесува 56,6 проценти. Лична сигурност чувствуваат 70 отсто од испитаниците, а стравот од воен конфликт е на ниво од 37,7 отсто, што е најнизок процент во регионот. Покрај тоа, улично насилство во своето опкружување забележале 20,8 отсто од граѓаните, што е помалку во споредба со регионалниот просек.
Како најпосакувана крајна дестинација кај оние што планираат да заминат убедливо води Европската Унија, за која се определиле 52,4 отсто од потенцијалните иселеници. На второ место е Швајцарија со удел од 18,8 проценти, додека прекуокеанските земји како САД, Канада и Австралија се избор за 16,5 отсто од граѓаните. Мал процент од испитаниците би се одлучиле за преселба во друга земја од балканскиот регион.
