Собранието на својата 130-та седница ги изгласа измените на Законот за градење и Законот за приватизација и закуп на градежно земјиште во државна сопственост, а за нов член на Регулаторната комисија за енергетика ја именуваше Ана Виткова. На пленарната седница беа донесени и Резолуцијата за миграциската политика 2026-2030 година со Акциски план, како и одлуката за избор на членови на Советот за граѓански надзор.
Според информациите објавени од медиумот Фактор, пренесувајќи ги податоците од новинската агенција МИА, Собранието го констатираше престанокот на функцијата на досегашниот член на Регулаторната комисија за енергетика, водни услуги и услуги за управување со комунален отпад, Лирим Сулејмани, и на негово место ја именуваше Ана Виткова.
Покрај кадровската промена во енергетскиот регулатор, пратениците без расправа донесоа повеќе одлуки за избор на претседатели, заменици, членови и нивни заменици во собраниските комисии, како и измени во составот на собраниските делегации во Парламентарното собрание на Советот на Европа и во Парламентарната димензија на Централноевропската иницијатива. Исто така беа донесени одлуки за основање пратенички групи за соработка со парламенти на други држави.
Меѓу усвоените акти е и Резолуцијата за миграциската политика на Република Северна Македонија за периодот 2026-2030 година со соодветен Акциски план, како и автентичното толкување на член 23 ставови (1) и (2) од Законот за урбанистичко планирање. Истовремено, Собранието заклучи дека барањето за автентично толкување на член 17 од Законот за пожарникарство, поднесено од пратеничката Славјанка Петровска, не е оправдано.
Најголема дискусија на седницата предизвика одлуката за избор на членови на Советот за граѓански надзор, која беше донесена со мнозинство гласови. Пратеникот Миле Талевски од СДСМ упати критики до ВМРО-ДПМНЕ, обвинувајќи за обид за партизација на ова тело преку именување несоодветни кадри со месечни паушали од 90.000 денари. Тој потсети дека Советот е формиран како директен одговор на масовното незаконско прислушување откриено во 2015 година.
„Нема да дозволиме да бидеме соучесници со оваа работа, затоа што контролата на безбедносните служби, контролата на сè она кое што како последица ни се случувало од 2015 година не треба да биде доведено до лица коишто работеле како раководители во државни центри за ментално здравје, немаат никаков абер што значи тоа што им го давате како обврска од утре да го работат“, истакна пратеникот Талевски за време на дебатата.
Претседателот на Собранието Африм Гаши информираше дека дополнително ќе го дефинира терминот за разгледување на Финансискиот план на РКЕ за 2027 година, одлуката за процентот на зафаќање за нејзино финансирање, како и предлог-законот за изменување на Законот за рибарство и аквакултура по скратена постапка.
