Пишува: Сашо Дуљанов
Употребата на вештачката интелигенција веќе не е новина во комуникациите. Таа за неколку секунди може да понуди текст, слика, анализа и десетина идеи. Никогаш не било полесно да се креира содржина, доволен е еден промпт, и веќе имаме текст кој изгледа коректно и јазично беспрекорно.
Затоа веќе не е важно прашањето колку брзо можеме да создадеме содржина, туку дали умееме да препознаеме што навистина вреди да се објави! А кога секој има пристап до истите алатки, проценката што е навистина добро станува поважна од продукцијата. И всушност после овој момент започнува вистинската ПР комуникација. Добриот ПР професионалец треба да процени дали содржината е вредна за објавување, дали текстот кој изгледа “совршено” може да ја оствари својата цел, да влијае позитивно за имиџот на брендот, да креира кредибилитет и да создаде доверба.
Некои работи се непроменети, а тоа е дека суштината на ПР-от денес, но и во иднина ќе остане иста, да обезбеди релевантна комуникација од двостран интерес, публиката да добие информација од корист, а компанија да оствари некаква цел. Добриот ПР решава проблем, менува перцепција, влијае на свеста на луѓето, креира влијание. Тој не е детерминиран од квантитетот на објавите, туку од суштината на содржината, односно како таа влијае, колку е разбрана, и дали креира доверба. Само со вистинска ПР комуникација брендовите може да растат.
Од ПР професионалците во 2027 година се повеќе ќе се бара да проценат што навистина вреди да се комуницира, во кој момент, и како тоа ќе влијае на ставовите и перцепциите на јавноста.
Во услови кога ВИ овозможи секој да може да креира содржина, ПР професионалците сѐ помалку ќе бидат ценети за генерирањето содржина, а повеќе за тоа како им помагаат на брендовите/лидерите/компаниите да се снајдат во ова комплексно секојдневие. Од нив ќе се бара да бидат доверливи советници со широко познавање на бизнисот, надворешното опкружување и очекувањата на засегнатите страни. Тие ќе треба да ја креираат перспективата, а не само информациите. А за тоа да го прават уште повеќе ќе треба да развијат способности да слушаат: колегите, публиката, индустријата, да дознаат кои информации и приказни се најважни и како да се градат посилни врски со целните групи на сите нивоа. Истовремено да бидат одговорни но и прагматични консултанти кои ќе им помагаат на брендовите да креираат комуникација од доверба.
Во 2027 година ПР експертите како лидери во комуникациите уште повеќе ќе треба да се вратат на основите – како да раскажат добра приказна, поткрепена со реални факти и сознанија. ВИ овозможи да се преплави пазарот со содржина, но како последица на тоа страдаше суштината, односно се повеќе имаме содржини кои навидум изгледаат добро, но не се релевантни, кредибилни и не создаваат доверба.
ПР комуникацијата се трансформира. Во 2027 година технологијата уште повеќе ќе биде основа во работењето. Но најдобрите комуникатори нема да бидат оние што најбрзо ќе го притиснат копчето „генерирај“, туку оние што критички ќе ги анализираат податоците генерирани со ВИ, ќе ги проверуваат, и на крај врз основа на своето знаење, искуство или интуиција ќе проценат што е добро, а што не.
Во такви услови што треба да прави еден бренд за да се издвои на пазарот во свет преплавен со слични ВИ содржини? Да преферира креирање емотивни приказни со кои ќе направи разлика. Подобар промпт може да помогне, но не може наместо нас да одлучи за тоа што е добро. Алгоритамот може да го забрза процесот, но не може да ја замени емоцијата, човечката одговорност. ПР комуникацијата и понатаму ќе биде работа со луѓе. Односите со медиумите, клиентите, колегите и јавноста не можат да се автоматизираат, тие се градат со искреност, доследност и подготвеност да се преземе одговорност. Па така во 2027 година ќе бидеме соочени со предизвикот да се каже „не“ на ВИ генериран предлог, доколку се процени дека пораката е без суштина.
Во 2027 ПР професионалците се пред бројни предизвици, но и дали ќе ја користат технологијата без да го изгубат сопствениот суд, глас и интегритет. Алатките ќе стануваат сè подобри, но прашањето е дали и ние ќе стануваме подобри во препознавањето на она што е важно.
The post Колумна на Сашо Дуљанов: Кои вештини ќе се очекуваат во 2027 година од ПР професионалците? appeared first on Marketing365.