Планираното спојување на Getty Images и Shutterstock, две од најголемите светски компании за лиценцирани фотографии и видеосодржини, официјално пропадна. Иако договорот вреден 3,7 милијарди американски долари доби одобрение во САД, британските регулатори оценија дека спојувањето би ѝ дало преголема пазарна моќ на новата компанија и би ја намалило конкуренцијата.
Договорот беше објавен во јануари 2025 година и имаше за цел да ги обедини ресурсите на двете компании. Од Getty Images сметаа дека на тој начин полесно ќе се справи со сè поголемото влијание на вештачката интелигенција во создавањето слики, ќе инвестира во нови технологии и ќе ги намали трошоците за работење.
Сепак, британскиот регулатор за конкуренција побара Shutterstock да го продаде својот глобален бизнис со уреднички фотографии, вклучувајќи ги и агенциите Backgrid и Splash, како услов за одобрување на спојувањето. Регулаторот оценил дека без оваа мерка би се намалила конкуренцијата, а медиумите би можеле да се соочат со повисоки цени за лиценцирање фотографии. Како резултат на ова, раководството на Getty Images заклучи дека таквата продажба премногу би ја намалила вредноста на договорот и се откажа од спојувањето со Shutterstock.
Неуспешниот договор покажува и колку силно вештачката интелигенција го менува пазарот на фотографии. И двете компании развиваат решенија базирани на вештачка интелигенција и склучуваат договори за лиценцирање со компании како OpenAI, но истовремено продолжуваат да ја нагласуваат важноста на професионалните и проверени фотографии, особено за новинарски и уреднички цели.
По објавувањето на одлуката, акциите на Shutterstock паднаа за речиси 30 проценти, додека и Getty Images се соочи со притисок на берзата. Од Getty Images најавија дека ќе бараат нови финансиски и стратешки можности, а Shutterstock потврдија дека ќе продолжат да работаат како независна компанија.
The post Пропадна спојувањето на Getty Images и Shutterstock вредно 3,7 милијарди долари appeared first on Marketing365.
