Македонски Телеком, Министерството за дигитална трансформација и Британскиот совет започнуваат партнерство за „Училишта на 21 век – Фаза 2“, проект насочен кон развој на дигитални вештини кај учениците. Проектот ќе трае од мај 2026 до јули 2027 година и ќе опфати ученици на возраст од 9 до 10 години и наставници од одделенска настава кои ќе работат на критичко размислување, решавање проблеми, програмирање, сајбер безбедност и основни концепти на вештачката интелигенција.
Македонски Телеком оди чекор понапред и опремува пет училишта низ Македонија со компјутерска опрема. Првата донација на компјутери се реализира во училиштето „Коста Рацин“ во Брвеница, каде што се одржа и настан за почеток на проектот.
„Имаме заедничка одговорност да им обезбедиме на децата пристап до знаења и вештини што ќе им бидат потребни во современиот свет. Преку овој проект, а и преку донацијата на компјутери, сакаме да создадеме подобри услови за учење, работа и развој на дигитални компетенции. Ова партнерство е важен чекор кон создавање генерации подготвени за иднината“, изјави Горан Марковиќ, Главниот извршен директор на Македонски Телеком.
„Училишта на 21 век – Фаза 2“ се спроведува во насока на развивање на дигиталните вештини и пошироко прифаќање и имплементирање на современите технологии во образовниот процес. На тој начин, ова партнерство дава значаен придонес кон модернизацијата на образованието и подготовката на младите за дигиталната иднина.
„Проектот ќе биде наменет за цела Македонија, опфаќа вкупно 100 училишта и повеќе од илјада наставници кои ќе поминат обука каде ќе се стекнат со вештини како да ги користат овие микро-бит уреди во нивната настава“, изјави Стефан Андоновски, Министер за дигитална трансформација.
„Со проектот „Училишта на 21 век – Фаза 2“, заедно со Телеком и Министерството за дигитална трансформација, обезбедуваме младите да развијат не само дигитални вештини, туку и самодоверба, критичко размислување и отпорност што ќе им бидат потребни во свет кој сè повеќе е обликуван од технологијата и вештачката интелигенција“, изјави Регионалната директорка на Британскиот совет за Западен Балкан, Клер Сиарс.
Проектот „Училишта на 21 век – Фаза 2“ придонесува за подготовка на младите луѓе со вештини, кои сè повеќе се бараат на идниот пазар на труд, вклучително аналитичко размислување, креативност, технолошка писменост и иновативност. Со програмата ќе се опфатат повеќе од 20.000 ученици на возраст од 9 до 10 години, и ќе се обучат околу 1.000 одделенски наставници.
The post Телеком влегува во партнерство со Министерството за дигитална трансформација и Британскиот совет за „Училишта на 21 век“ appeared first on Marketing365.
