Утро ко утро, 31 декември 2025-та (додуша сообраќајот малце ко полабав денеска) стартуваме со “такси” обврските и потоа правец кон нови “работни победи”. Денеска, дека ќе се сработи нешто спектакуларно и нема, но задачата да се напише поздравен текст (овој) останува. После може и на некоја пијачка да се оди!
Но, најпрво, една важна задача. Традиционално посета на бензиска и полнење на резервоарот до FULL (F). Зошто тоа токму утрово?
Затоа што сакам да ја испратам старава година “гледајќи ја од високо”…..да влезам во новата година спремен за долги патувања, со полна сила, со многу “октани” што експлозивно ќе согоруваат!
Исто така, сакам бе и да гледам кога цртичката ми покажува “F”.
Ме потсетува да кажам F на се што не чини, F на секому што не заслужува “да се возиме” заедно.
2025 беше година ко година, со убави и не толку убави работи. Економијата (во најширока можна смисла сватена) не беше баш најликвидна, имаше плачки и смеа – но се случија и неколку феноменални “креативни дела” кои ги полнат батериите и во “студени денови”. Баш онака како што доликува на еден ЦЕЛ КРУГ на земјата околу сонцето. Со различни искуства.
Драги, поминати 365 дена! Денеска Ви кажуваме БЛАГОДАРАМ што имавме можност да Ве искусиме. Време е да го “ресетираме бројчаникот” и да посакаме ДОБРЕДОЈДЕ на 2026-та година и новите 365 дена….за сите нас! Со насмевка да донесеме светлина во нив.
Ресетирани, рестартирани…во следните 365 дена ние ќе останеме верни на нашата мисија да ја афирмираме и промовираме креативната индустрија, да зборуваме за маркетинг, комуникации, адвертајзинг, медиуми! Спремаме и неколку новитети и со голема возбуда гледаме кон нивна реализација во следните денови и месеци!
Им благодариме на сите наши читатели, партнери, пријатели и соработници што не поддржуваат во оваа мисија, што стојат рамо до рамо со нас секогаш спремни да помогнат и да бидат дел од Маркетинг365! Ние сме тука секогаш за нив, како и тие што се тука за нас. Тоа зборува за сите нас, за тоа какви луѓе сме станале!
Драги читатели, Ви посакуваме убави празнични денови, наполнети “резервоари” со љубов, среќа и радосни моменти! Среќна 2026 година! Сите искуства кои треба да се случат – нека се случат! Спремни сме!
The post Да го ресетираме бројчаникот – со резервоар до “F”! appeared first on Marketing365.
