Пишува: Милан Савов, основач и извршен директор на SmartClick
Дали ви се случува да имате веб-страница која ви се допаѓа и содржината е квалитетна и корисна, но сепак не ги освојувате тие многу посакувани високи позиции на Гугл и другите пребарувачи?
Што би можело да биде причината за тоа? Постои ли начин да ја поправите ситуацијата?
Секако, но прво да разгледаме што всушност НЕ треба да правите кога целите кон онлајн видливост.
- Вашиот веб-сајт постои само затоа што така треба
Колку пати досега сте сретнале сајт кој не содржи ниту најосновни информации за компанијата, целите и понудата? Зарем вие би купиле нешто од таква страница, која едвај има и основни податоци за контакт? Би ве мотивирало ли тоа да побарате услуга од таква компанија или да ја посетите нивната физичка локација?
Сега, размислете во другата насока. Можеби имате совршена бизнис идеја и задоволни корисници, но дали го користите потенцијалнот на сајтот за да ја проширите целната публика и да добиете уште повеќе клиенти? Или пак сте слушнале дека успешните компании имаат сајт, но немате доволно време да инвестирате во содржини и уредување.
Доколку имате сајт само за да го имате, време е да направите промена. Започнете да креирате страници (pages) и да ги пополните со релевантни содржини. За релативно кратко време ќе ја забележите разликата и ќе го откриете продажниот потенцијал на вашиот сајт, што само може да го подобри целосниот бизнис раст.
- Не комуницирате со вашиот идеален клиент
Втор предизвик поради кој можеби немате доволно онлајн видливост е ако не знаете кому се обраќате или не користите вистинска стратегија за да комуницирате со својот идеален клиент.
Најпрво, треба да го дефинирате профилот на идеалниот клиент. Тоа е фиктивна замисла за клиент кој ги исполнува сите ваши очекувања за добра и успешна соработка, а на кој можете да му донесете голем бенефит во растот. Треба да ги дефинирате сите детали, од име и професија, па се до предизвици и проблеми кои ги има во својата работа.
Како резултат, ќе добиете идеја на кој начин треба да комуницирате, како да го прилагодите тонот и во колкав процент можете да користите технички жаргон во таа комуникација.
Замислете вашиот идеален клиент да очекува јасна и транспарентна комуникација, а содржините на сајтот да не се разбирливи и да се преполни со терминологија која бара дополнителни објаснувања. Ова може да биде доволна причина да немате доволно релевантност во вашата индустрија, а со тоа да го изгубите потенцијалот за високи позиции на Гугл.
- Дизајн кој ви е убав само вам
Иако дизајнот на сајтот и естетиката се многу субјективни, сепак постојат практики кои треба да ги почитувате, за да оставите силен визуелен впечаток. За да бидете сигурни дека се движите во вистински правец, прашајте некој пријател или соработник што мисли за дизајнот на вашиот сајт.
Бидете отворени да чуете искрено мислење околу сегашниот дизајн и препораки за подобрување во иднина. Тргнете се настрана од личните преференци и посветете се на дизајн кој е лесно вчитлив и секако, лесен за користење и навигација.
Отстранете ги сите дистракции од сајтот и прифатете го минималистичкиот пристап, складните бои и читливите фонтови, за да го подобрите целосното корисничко искуство.
- Ги игнорирате SEO практиките
Денешната оптимизација за пребарувачи е доста поразлична од онаа која се применуваше пред неколку години. Можеби претходно беше важно да вметнувате клучни зборови во содржината и да уживате во заслужените позиции, но денеска се дава предност на корисноста и вредноста на самата содржина.
Сепак, тоа не значи дека треба да заборавиме на веќе воспоставените практики за оптимизација. Затоа, најпрво проверете дали вашето SEO е застарено, а потоа применувајте ги новите знаења и стратегии, со кои за секое релевантно пребарување ќе креирате уште порелевантна и повредна содржина која вашите читатели ќе ја обожаваат.
- Не го разбирате маркетиншкиот аспект на сајтот
Вашиот веб-сајт има огромен потенцијал да ги подобри резултатите од маркетинг напорите. Како? Најпрво, самата содржина е форма на маркетинг, знаејќи дека може да биде откриена преку пребарувачите или да биде дистрибиурана низ различни канали за комуникација. Понатаму, со помош на контакт-формите и претплатата на содржини вие креирате потенцијални клиенти или leads (лидови), кон кои го насочувате таргетираниот маркетинг.
Исто, на сајтот можете да ги поставите и вашите профили и страници на социјалните мрежи, но и од социјалните мрежи да ги насочувате корисниците кон самиот сајт. И секако, доколку продавате услуги или добра, лесно можете да го правите тоа преку комерцијалните страници на сајтот.
Дополнително, атрактивен сајт ви помага да привлечете клиенти или купувачи и во вашата физичка локација (доколку ја имате) бидејќи давате информации и за понудата, но и нудите сведоштва и оценки од претходни и актуелни корисници.
Што можеме да заклучиме од сето ова?
Сајтот, односно веб-страницата е одличен начин да ја презентирате вашата понуда на целната публика, да привлечете релевантни посетители на сајтот, да бидете транспарентни од секој можен аспект, и секако, да практикувате таргетиран маркетинг знаејќи дека сите напори се насочени кон привлекување и негување на целната публика. Кога на сето тоа ќе ја додадете и естетиката на дизајнот, веќе ја имате една од најмоќните алатки за да градите стратегија за раст и проширување на бизнисот.
The post Колумна на Милан Савов: Пет причини поради кои вашиот веб-сајт не рангира високо на Google appeared first on Marketing365.
