По неодамнешното претставување на новиот бренд идентитет, кој предизвика разни реакции во јавноста, британскиот производител на автомобили Jaguar го претстави и првиот модел на автомобил во духот на новиот брендинг.
За време на Неделата на уметност во Мајами, брендот го претстави новиот електричен модел „Type 00“, кој ја отелотворува креативната филозофија на Jaguar за раскошен модернизам во во новата електрична ера без емисии.
Автомобилот се карактеризира со долга хауба, ниска линија на покривот која непрекинато ја опфаќа и заднината – инаку без прозорец – што ќе биде решено со задни камери. Моделот има две широки врати и масивни тркала кои го истакнуваат авангардниот изглед на автомобилот. Во внатрешноста, автомобилот нуди минималистички, но префинет ентериер, со месингана оска што поминува низ центарот и камени акценти кои додаваат уникатен допир на луксуз.
„Магијата на Jaguar ми е блиску до срцето – оригинален британски луксузен бренд неспоредлив по своето наследство, уметност и емотивен магнетизам. Тоа е Jaguar-от што го враќаме и ќе го создадеме истото чувство на вчудовиденост што ги опкружува иконичните модели како E-type. Нашето патување е веќе започнато, водено од нашиот оригинален етос да не копираме ништо – и резултатите ќе бидат спектакуларни“ – истакнува Адријан Мардел, генерален извршен директор на компанијата Jaguar Land Rover.
Новата креативна филозофија на Jaguar се заснова на три основни принципи кои се изразуваат во секој аспект од брендот и секаде каде што тој се појавува. Тие принципи, според брендот, се: Живописност, Модерност и Убедливост (Exuberant, Modernist, Compelling).
Поаѓајќи од тие принципи, моделот „Type 00“ се наметнува како увертира за идната генерација на Jaguar која има за цел повторно да ги долови духот и суштината на брендот на најдобар и најдоследен можен начин.
