Пишува: Емилија Гроздановска, маркетинг менаџер.
Во последно време, во ходниците на маркетинг агенциите се чувствува една специфична тишина. Тоа не е онаа креативна тишина пред голем пич, туку тишина на индустрија која полека сфаќа дека тлото под нејзините нозе се поместува. Како некој што секојдневно го менаџира овој процес, гледам трансформација која оди многу подлабоко од воведувањето на нов софтвер.
Вистината е сурова: AI не е уште една алатка во нашиот toolbox. AI е новиот систем.
Со години, агенцискиот модел опстојуваше на една едноставна, но честопати вештачка равенка: луѓе × часови = производ. Но, тој модел на „billable hours“ полека станува артефакт. Кога еден бренд може самостојно, со неколку прецизни промптови, да генерира визуели, да тестира десетици верзии на копи и да оптимизира буџети, логичното прашање е: „А, зошто тогаш ми е потребна агенцијата?“
Од извршители до архитекти: Преминот кон „Outcome-based“ модели
Тука се случува клучниот пресврт. Клиентите веќе не сакаат да плаќаат за нашиот труд, туку за нивниот раст. Во мојата секојдневна пракса, гледам како фокусот се префрла од „дајте ни 10 објави месечно“ кон „како да го зголемиме customer lifetime value“.
Што значи ова во реалноста? Наместо да наплаќаме за времето поминато во дизајнирање на 50 различни банери (нешто што AI сега го прави за секунди), ние се фокусираме на outcome-based модел. На пример, наместо фиксен месечен надомест за „одржување канали“, вредноста на агенцијата сега се врзува за реални бизнис метрики, намалување на трошокот за аквизиција (CAC) или зголемување на конверзиите преку паметна сегментација на податоци.
Вредноста повеќе не се мери според тоа „колку работевме“, туку „што променивме“ во билансот на клиентот.
Новата улога на лидерот (или како да не станете вишок)
Денес, мојата улога како маркетинг менаџер не е да „надгледувам кампањи“. Мојата вистинска задача е да бидам архитект на еден поинаков систем.
Да се биде маркетинг лидер во ера на AI значи:
- Стратегија пред егзекуција: Да знаеш како да ги поврзеш точките што AI не ги гледа.
- Податоци наместо претпоставки: Да претвориш илјадници генерирани податоци во една, храбра бизнис одлука.
- Креативна одговорност: Креативноста повеќе не е само „да изгледа убаво“, туку да има интелигентна цел.
Човечкиот фактор како последна линија на одбрана
И покрај целиот хајп, AI има една огромна празнина: нема чувство за контекст и култура. Алгоритмот може да предвиди однесување, но не може да ја разбере нијансата на локалниот хумор или специфичниот страв на потрошувачот во кризни времиња.
Нашата предност веќе не е во брзината на испорака. AI е секогаш побрз. Нашата предност е во длабочината. Нашата работа е да го дадеме „зошто“, додека AI го решава „како“.
Еволуција или изумирање
Агенциите нема да исчезнат, но ќе исчезнат оние што се кријат зад застарените извештаи полни со суетни метрики (vanity metrics).
Иднината им припаѓа на оние кои го прифаќаат AI како партнер за да се ослободат од мануелното „штанцање“ содржини и конечно да се вратат на она што маркетингот отсекогаш требаше да биде: двигател на бизнисот, а не само декорација.
Маркетингот не умира. Тој само конечно станува паметен.
The post Крајот на „продавањето магла“: AI не го менува маркетингот, туку правото да се биде релевантен appeared first on Marketing365.
