Во денови кога организацијата на настани сè повеќе станува комплексен спој од стратегија, креативност и беспрекорна изведба, Александра Меќамова ја открива Анатомијата на еден настан – од првата идеја до последниот аплауз. Преку разговорот ѕиркаме зад сцената на процесот што публиката го гледа само на сцена, а кој всушност започнува многу порано и трае многу подолго. Како дел од McCann, агенција членка на AMA групацијата, Александра зборува за тоа како големите настани денес не само што се организираат, туку и се осмислуваат, обликуваат и се претвораат во искуства што се паметат.
М365: Како започнува еден настан во агенцијата – од креативниот концепт или од логистичката реалност? Кој го поставува темелот?
Александра Меќамова: Реалноста и идејата мора да се сретнат во еден момент. Би требало првата искра да доаѓа од креативниот концепт, но во секојдневието и местото каде живееме и работиме, темелот го поставува логистиката, односно буџетот, роковите, достапната локација. Би додала дека без добра организациска матрица и најубавата идеја нема крилја.
М365: Како соработуваш со креативниот тим? Опиши го процесот од бриф, до идеја, до моментот кога ја претвораш во изводлив план.
Александра Меќамова: Поради различната природа и вештини на креативниот и реализацискиот тим, од клучно значење е иницијалниот бриф да биде јасно структуриран и поставен во рамките на реалните можности на локалната средина. Toa овозможува креативниот процес да се движи во јасни граници, без да се ограничува суштината на идејата.
Во секој проект постојат моменти кога улогите ни се менуваат природно, идејата понекогаш доаѓа од креативниот тим, понекогаш од продукцијата, а често изводливоста ја обликува самата креативна насока.
Оваа динамика функционира успешно само кога постои меѓусебно разбирање на процесите и основно познавање на работата на другата страна. Кога креативецот ќе ја знае логиката на терен, а реализаторот ќе ја почувствува суштината на идејата, се создава платформа на која проектот расте сигурно.
Јас често сум таа што ги „приземјува“ идеите, но во реалноста, станува збор за оперативна свесност. Познавањето на локалниот контекст, цените, односите, роковите и реалните можности во оваа средина е клучно за секој концепт да има шанса да се реализира без компромиси што би ја нарушиле суштината.
А, креативниот тим ми верува затоа што знае дека секоја забелешка доаѓа од искуство и одговорност и кога нешто оценувам како неизводливо, тоа не е „не“, туку насока кон решение што може да функционира.
Токму таа доверба овозможува отворен дијалог и стабилен процес каде креативците знаат дека кога нешто ќе биде потврдено како возможно, тоа навистина ќе се реализира.
М365: Кога креативата „лета“ предалеку, а буџетот или локацијата тоа не го дозволуваат – како го враќаш процесот на реални нозе без да ја „убиеш“ идејата?
Александра Меќамова: Кога креативноста е и премногу присутна и тоа само затоа што нашата имагинација е способна да предвиди уште толку многу повеќе, од непроценлива важност е да размислиме која е суштината на проектот, кои ефекти и идеја сака да ги пренесе, што е „must-have“, а што е она што може да преживее и во поедноставна форма? Со паметни адаптации идејата останува жива, а продукцијата останува изводлива.
М365: Што е најголем предизвик во комуникацијата меѓу клиент – креативци – продукција? Каде најчесто настануваат недоразбирања?
Александра Меќамова: Кога различни светови се среќаваат околу една иста идеја, најтенката линија на која сè се држи е комуникацијата. Најголемиот предизвик лежи во тоа што секоја од трите актери има различна перспектива, а успехот зависи од способноста тие перспективи да се усогласат. Недоразбирањата најчесто се појавуваат таму каде што недостигаат основна доверба, почит и чиста, јасно формулирана комуникација.
Клиентот „го гледа“ резултатот, креативците го чувствуваат концептот, а продукцијата ја носи тежината на реализацијата.
Низ доверба, нема сомнеж во намерите, со почит, мислењата не се конкурентни, туку компатибилни и тогаш сите заедно го чекориме патот кон истата цел.
М365: Која е твојата најсилна вештина во агенцискиот „event“-процес: организација, преговарање, импровизација или смиреност под притисок?
Александра Меќамова: Во агенцискиот „event“-процес најсилно доаѓа до израз комбинацијата од прецизна организација, постојана внатрешна мотивираност и природен стремеж кон подобрување. Да се биде самокритичен низ реално согледување на ситуациите, транспарентен во комуникацијата со сите засегнати страни и со елегантна доза на директност што го стабилизира процесот дури и кога притисокот е висок. Во моменти на хаос, мојата работа е да внесам структура, ред и фокус – клучни елементи за успешна реализација на секој настан.
М365: Како изгледа твојот идеален ден пред настанот? Кои точки ги проверуваш по секоја цена?
Александра Меќамова: Идеалниот ден пред настан секогаш е исполнет со фокусирана енергија за сè да се постави на свое место. Се прави финална техничка проверка за да се увери дека секој светлосен сигнал, звук и сценски елемент функционира беспрекорно. Следува координација со сите добавувачи и тим лидери, кратки разговори на препроверка на различните аспекти на реализацијата што неминовно го носат и чувството дека сите дишат во ист ритам.
Временската програма се потврдува уште еднаш, внимателно се прегледуваат бекап-плановите, затоа што секој успешен настан има тивко подготвени алтернативи што оставаат простор изолиран од паника.
Тоа е ден на деталите, на финесите што никој не ги гледа, а прават сè да изгледа лесно. Ден кога ништо не се остава на толкување, затоа што токму јасноста ја создава сигурноста на целата екипа.
М365: Која е најважната мала работа што често никој не ја гледа, а прави огромна разлика во квалитетот на настанот?
Александра Меќамова: Духот, тимската синергија. Оној момент кога светлото, звукот и енергијата на луѓето го „запалуваат“ просторот. Магијата доаѓа кога сите придонесуваат за ист ефект.
М365: Сподели ситуација кога креативниот концепт во пракса „изгледаше подобро од презентација“. Што ја направи магијата?
Александра Меќамова: Многу концепти добиваат различна сила кога ќе преминат од слајд во реален простор и доволно е да се види светлото, звукот, темпото и луѓето кои ја создаваат атмосфера што никако не може целосно да се прикаже низ презентација на екран.
Во суштина, магијата не доаѓа од „подобро“ или „полошо“ од презентацијата, туку од живото искуство: од тимот кој работи синхронизирано, од деталите што оживуваат само во физички амбиент и од она чувство кога идејата конечно станува доживеана, а не само замислена.
М365: Која е најважната научена лекција од настан кој не поминал според планот – и како тоа те промени во следните проекти?
Александра Меќамова: Понекогаш најголемите лекции не доаѓаат од совршено реализираните настани, туку од оние што нè принудуваат да погледнеме подлабоко во себе и околу себе. Зрелоста во професијата не е само во техничката умешност, туку во способноста да се остане свесен, присебен и искрен кон сопствениот дел од приказната.
Не секогаш можеме да влијаеме на туѓото темпо, на динамиката на околината или на степенот на разбирање кај сите вклучени. Понекогаш процесот оди во погрешна насока што ја гледаме однапред, а немаме можност да ја смениме туку само да управуваме со последиците од истата.
Токму тие искуства го формираат следниот, попрецизен, побистар, со поголема јасност во комуникацијата и со повисока дисциплина во поставување на условите, пристап кон проектите.
М365: Како би ја дефинирала улогата на „event“ менаџерот во агенција денес – дали е проект-менаџер, продуцент, кризен менаџер, психолог или диригент?
Александра Меќамова: Во прашањето лежи и одговорот :). Но, да не звучам премногу претенциозно, суштината на „event“ менаџерот е во едно нешто што често се заборава: ова е улога што бара искрено уживање во самиот процес. Не како ентузијазам „на хартија“, туку како вистинска енергија што го држи човек присутен, смирен и отпорен на сите промени, притисоци и непредвидливи „заврзлами“ што ги носи секој настан. Токму тоа уживање во динамиката и создавањето, можеби и малку повеќе од вообичаено, е она што ја прави оваа улога одржлива. И што дозволува сите тие улоги да се носат природно, без да го изгубат човечкиот дел од професијата.
М365: За крај, што би му препорачала на некој кој сака да се занимава со организација на настани?
Александра Меќамова: Не сум на позиција да давам универзални препораки, ниту верувам дека постои „врв“ по кој престанува учењето. Она што го покажува моето искуство е дека љубопитноста, свесното трагање по различни искуства и внимателното согледување на сопствените доживувања се клучни елементи за оваа професија.
The post Анатомија на еден настан со Александра Меќамова од McCann Скопје, дел од АМА групацијата appeared first on Marketing365.
