Грижата за животната средина започнува од домот – од грижата секое парче отпад, секоја хартија, секоја пластика и секое стаклено шише, да заврши онаму каде што припаѓа. Бидејќи, секој отпад не е ѓубре. Најголемиот дел од отпадот може да се рециклира, преработи и пренамени за да има нов живот и нова употреба, одново и одново. Токму тоа е пораката која Пакомак сака да ја пренесе до сите жители на нашата земја: да бидат одговорни чувари на животната средина.
Од едукација за различните типови отпад, па се’ до појаснување на процесите за селектирање и рециклирање, компанијата ја зазема улогата на двигател на зелената транзиција во Македонија. А ефектите од нивната работа ги чувстува локалната заедница, но и секој еден поединец кој своеволно се приклучува на ваквата „зелена иницијатива“.
Чистата животна средина е доволна придобивка сама по себе, но граѓаните сега имаат и дополнителна мотивација за собирање и правилно одложување на отпадот. Воведувањето на Повратните вендинг машини (ПВМ) целосно го трансформираше начинот на селектирање пластичен отпад во земјата, давајќи им можност на корисниците да добијат дополнителна вредност од одложувањето на отпадот. ПВМ работат на многу едноставен принцип: тие се поврзани со мобилната апликација ЕкоМак и за секое одложено пластично шише или лименка во машините, корисникот добива т.н. „зелени поени“ на неговата корисничка сметка. Потоа, овие поени може да се искористат за попусти при пазарење, а во иднина и за плаќање на општински и јавни услуги, за во кафулиња и за поддршка на хуманитарни акции. Инаку, ваквиот принцип на „зелени поени“ за селектирање отпад кој е одржлив е уникатен како имплементиран систен токму во Македонија.
Овие машини се современ и иновативен начин да се мотивираат луѓето селективно да го одложуваат отпадот, но и исклучително ефективен начин да се намали количината на пластичен отпад која завршува во контејнерите, а потоа и на депониите. Проектот за поставување на ПВМ Пакомак го реализира со голема поддршка од Швајцарија, која стои зад проектот уште од самиот почеток, и според нив овој проект е особено важен за подобрување на отпадната инфраструктура и за достапноста до садови за селектирање за граѓаните, посебно за оние од урбаните средини.
„Досега поставивме 84 повратни вендинг машини, преку кои годишно се рециклираат 15 милиони шишиња и лименки. Во следните години, бројката на ПВМ машини ќе се зголеми, но ќе започнеме и со секундарна селекција, дополнително ќе ја унапредиме инфраструктурата ќе отвориме едукативен центар за ученици. Долгорочната цел ни е да останеме прва асоцијација за рециклирање во Македонија“, изјави Филип Ивановски, извршен директор на Пакомак.
Секој граѓанин на Македонија во просек годишно произведува повеќе од 360 килограми отпад, од кои 50-80 килограми се отпад од пакувањe. Годишно во земјава се создаваат повеќе од 700.000 тони отпад, од кои повеќе од 100.000 тони се во пакување. Овие бројки се крајно загрижувачки, но решението Пакомак го гледа во совесното однесување, здравите навики на граѓаните и во циркуларната економија.
The post Секој отпад не е ѓубре: Како да се осигурате дека пластиката и лименките не завршуваат на депонија? appeared first on Marketing365.
