Еден од најпопуларните македонски YouTube креатори Стефан Лазаров одбележува значаен јубилеј – 5 години постоење на својот канал, а по тој повод, утре (18 јуни) во ресторанот Парк Рагуза ќе приреди гала вечер насловена „Lazarov Awards“, во рамките на која ќе биде одржан најголемиот giveaway во регионот, со највредниот подарок досега – стан од 36 метри квадратни во населбата Ченто во Скопје. Покрај ова, ќе следуваат и други вредни подароци, како симбол на благодарност кон заедницата која со години го следи и поддржува Лазаров.
Настанот, кој ќе се пренесува во живо на неговиот YouTube канал, претставува кулминација на петгодишното дигитално патешествие на Стефан Лазаров – еден од највлијателните македонски креатори на содржина, кој преку подкасти и интервјуа успеа да изгради медиумска платформа што ги надминува границите на класичната забава.
Настанот ќе се одржи во амбиент збогатен со врвна продукција и внимателно осмислена програма, која ќе ја сочинуваат и музички настапи на најголемите ѕвезди на македонската естрада и уметничка сцена: Тамара Тодевска, Игор Џамбазов, Елена Ристевска, Тони Зен, Слаткаристика, Два Бона и други. Настапите ќе придонесат за уникатна атмосфера што ќе ја слави креативноста, пријателството и лојалноста на публиката.
Во рамки на програмата, ќе бидат доделени и специјални признанија за личности, проекти и заедници кои оставиле силен белег во медиумскиот и јавниот живот во земјава. Настанот е осмислен како спој на емоција, благодарност и инспирација, кој ја рефлектира суштината на целата платформа на Лазаров – создадена со срце и искрено внимание кон луѓето.
Особено емотивен момент од вечерта ќе биде и прикажувањето на тизер за документарниот филм посветен на Зоран Василевски – Фаци, прерано починатиот новинар и близок пријател на Лазаров, чие дело и личност оставија длабока трага во македонското медиумско пространство. Овој дел од програмата ќе биде потсетник за важноста на автентичноста, човечноста и вредностите кои траат.
Со „Lazarov Awards“, Стефан Лазаров не само што одбележува еден значаен јубилеј, туку и поставува нови стандарди за тоа како изгледа медиумска платформа од новата дигитална ера – платформа што ги обединува луѓето, слави влијанието на креативноста и ја наградува верната публика.
Повеќе за највредниот подарок досега, стан од 36 метри квадратни во населбата Ченто во Скопје можете да дознаете на следниот линк – https://www.instagram.com/reel/DK-MPCVNnx2/?igsh=MThsZHl6bWUzd2huYg%3D%3D.
