На наше големо задоволство, денешен гостин на Маркетинг365 е Тодорка Сајкова, бренд менаџер за пиво во Прилепска Пиварница. Повод за разговорот ни беше новиот изглед и вкус на „Златен Даб“ и одбележувањето на 100-годишниот јубилеј од основањето на Пиварницата. Тодорка ни открива повеќе за еволуцијата на брендот, за креативниот процес позади новата кампања, соработката со германски експерти за пиво, плановите за одбележување на значајниот јубилеј на компанијата и ширењето на странските пазари.
M365: Оваа година, Прилепска Пиварница одбележува еден век постоење, а неодамна го претставивте и новиот „Златен Даб“ – со еволуиран изглед и вкус. Ќе можете ли да нè водите низ креативниот процес кој доведе до новата етикета на Златен Даб?
Тодорка Сајкова: Оваа година е јубилејна за Прилепска Пиварница, односно година во којашто се одбележува еден век постоење на пиварницата. Тоа беше главниот повод за да се дизајнира нова етикета на Златен Даб. Но, промената не е само во визуелниот изглед на пивото, туку и во новиот, збогатен вкус на Златен Даб.
Процесот на создавање на новата етикета започна со креирање на креативна стратегија која ги содржеше сите аспекти, анализи и идеи за комплетна промена на визуелниот идентитет на брендот со цел да го позиционира како современ и квалитетен производ кој ги следи светските трендови во дизајнот. Креативниот тим од маркетинг и адвертајзинг агенцијата „Футура 2/2“ посветено работеше на дизајнот, тим составен од професионални дизајнери со долгогодишно искуство во креирање на брендови со врвен дизајн и квалитет. Тимот на „Футура 2/2“ со страст и минуциозен пристап се погрижи избраниот дизајн да се развие на сите пакувања на Златен Даб, доведувајќи ги до максимална естетизираност и убавина сите детали на етикетата. Прекрасно е кога се работи со љубов и желба да се добие најдоброто, посебно кога резултатот наидува само на позитивни и пофални реакции.
M365: Како новиот изглед на пивото го одразува неговиот подобрен вкус? Што може да очекуваат љубителите на пивото кога ќе го видат новото пакување?
Тодорка Сајкова: Новиот изглед на Златен Даб го одразува неговиот збогатен вкус на неколку начини. Дизајнот на пакувањето пренесува чувство на квалитет и софистицираност. Кога потрошувачите ќе го видат новото пакување, препознаваат визуелно привлечен идентитет на брендот кој ги одразува уникатните карактеристики на Златен Даб. Новото пакување дефинитивно го подобрува целокупното искуство за љубителите на пивото со создавање силна визуелна врска со подобрниот вкус. Предизвикува љубопитност и возбуда, повикувајќи ги потрошувачите да го истражуват и вкусат Златен Даб.
M365: На новата етикета на Златен Даб стои потписот на проф. д-р Михаел Цепф од Германија. Ќе можете ли да ни кажете нешто повеќе за Вашата соработка со професорот Цепф?
Тодорка Сајкова: Тимот на Прилепска Пиварница работеше неуморно на усовршување и подобрување на рецептот за подготовка на Златен Даб, консултирајќи домашни и странски експерти, со цел да ги помести границите на квалитетот и да обезбеди навистина исклучително искуство за вистинските пивски уживатели. Соработката со проф. д-р Михаел Цепф трае во континуитет со години. Заеднички развивавме нови производи, ги унапредувавме постојните и придонесовме за издигнување на пивската култура во земјата. Проф. д-р Михаел Цепф од Германија, чијшто потпис за квалитет стои на новата етикета на Златен Даб, беше поканет како пивски експерт да даде свои совети и препораки околу рецептурата и строгата контрола на квалитетот. Тој, својата оцена ја формираше врз основа на основните фактори во дефинирањето на пивото, како што се бојата, пената, балансот на вкусови, свежината итн. Светлата боја, бистрината, газираноста, горчината како и другите карактеристики на пивото, го прават Златен Даб синоним за европско лесно лагер пиво и го двојат од другите пива на македонскиот пазар по својата уникатност и свежина.
M365: Со претставувањето на новиот изглед беше објавена и нова видео реклама, во која покрај зелената, доминира и контрастната црвена боја – сето тоа проследено со динамични сцени на млади луѓе кои уживаат во музика. Како дојдовте до идејата и која е пораката на новиот рекламен спот?
Тодорка Сајкова: Употребата на контрастни бои како зелена и црвена создава визуелно впечатлива и привлечна естетика, која е избрана за да предизвика чувство на енергија, возбуда и живост. Динамичните сцени на млади луѓе кои уживаат во музиката ги прикажуваат животниот стил и атмосферата во согласност со целната публика и вредностите на брендот. Пораката на новата реклама е насочена кон еволуцијата преку темите на младоста, забавата и поврзаност. Преку прикажување на младите луѓе кои уживаат во музиката и динамичните бои, рекламата се обидува да пренесе чувство на радост, забава и возбуда, да предизвика позитивни емоции и да создаде чувство на задоволство кај гледачите. Рекламното видео го потврдува брендот како возбудлив, модерен и привлечен за младите луѓе, а истовремено ги нагласува уникатните квалитети на Златен Даб.
M365: Кога сме кај огласувачката кампања, какви промоции, настани и активности нè очекуваат во текот на годината по повод едновековниот јубилеј на Прилепска Пиварница?
Тодорка Сајкова: Од самиот почеток на 2024 година ние активно започнавме да се подготвуваме за бројните интересни настани по повод 100-годишнината на пиварницата. Преку употреба на специјално дизајнираниот жиг со слоганот „Со љубов кон традицијата наздравуваме за иднината“ ние ги означивме производите кои се произведуваат во самата пиварница и се дел од оваа 100-годишна традиција. Пивото Крали Марко кое одбележува 100-годишно производство доби нова модерна лименка, Limited Edition издание преку кое ги прикажавме сите модификации и промени во изгледот на етикетата на овој бренд. Наскоро, во јуни нè очекува корпоративната прослава за деловни партнери и соработници, а веднаш потоа нè очекува големо одбележување на стогодишниот роденден во Прилеп. Годината на одбележување на еден век од постоењето на Прилепска Пиварница ќе биде заокружена на спектакуларен начин со бројни активности и за клиентите и за вработените и на тој начин ќе ја прикажеме својата богата историја и традиција на производство на алкохолни и безалкохолни пијалоци. Преку маркетинг кампањи и возбудливи промоции за повеќето брендови, пиварницата ќе ја зајакне комуникацијата широката публика, како и со своите соработници и долгогодишни лојални клиенти.
M365: За крај, каде ја гледате „Прилепска Пиварница“ и пивото „Златен Даб“ во следните 100 години? Какви се плановите за проширување на меѓународниот пазар?
Тодорка Сајкова: Златен Даб како македонско лагер пиво од поодамна е веќе присутно на неколку континенти – Европа, Австралија и Америка. Односно, миграцијата на нашиот народ придонесе и пивото да ги следи своите конзументи и побарувачката која доаѓа природно од нивна страна. Нашите цели за оваа и наредните години е да го прошириме присуството пред сè во соседните земји, како и во повеќето земји од Централна и Југоисточна Европа. Квалитетот на Златен Даб е веќе широко препознаен и прифатен од страна на конзументите, па затоа сме сигурни дека имаме уште поголеми и нови хоризонти за освојување.
The post Интервју со Тодорка Сајкова од Прилепска Пиварница: Како се создаваше новиот изглед и вкус на „Златен Даб“ appeared first on Marketing365.
