Пишува: Софија Семенпеева, директорка на маркетинг агенцијата Effectiva.
Замислете дека сте во маркет. На списокот за пазарење, меѓу другите производи има и шпагети. Но, во моментот ги нема оние шпагети кои ги купувате секогаш. Сигурно нема да одите во друг маркет само за еден производ, па треба да изберете од неколкуте брендови на полицата пред вас. Кои шпагети ќе ги ставите во кошницата? Според истражувањето на WestRock од 2018 година, дури 81 процент од потрошувачите пробале нешто ново, бидејќи производот „им фатил око“. Единствен „виновник“ за тоа е токму моќта на визуелната комуникација на брендовите.
Сликата вреди илјада зборови. Можеби е клише, но е вистинито. И ако на тоа додадете квалитетна вербализација ќе добиете моќен бренд. Сликата ја испраќа првата порака и го креира и почнува да го гради мислењето на купувачите за вашиот производ. Првата слика е таа која останува подолго во меморијата на човекот. Поголемиот дел од луѓето побрзо реагираат на сликата отколку на текстот. Умот обработува слики побрзо од зборови.
Квалитетните визуелни решенија ефикасно ја пренесуваат пораката и имаат позитивно влијание врз зајакнувањето на вашата деловна активност. Без креативни и привлечни визуелни решенија дури и најдобрите карактеристики на производот можат да бидат изгубени или погрешно разбрани.
1. Придобивки и предности од квалитетна визуелна комуникација
– Ефикасно и брзо пренесување на информацијата
Во споредба со вербалната комуникација визуелната преовладува со својата ефикасност во комуникацијата.
– Леснотија во разбирањето – едноставност
Една од примарните предности што ја нуди визуелната комуникација е едноставноста.
– Флексибилност – меѓукултурна комуникација
Замислете дека патувате низ светот и истражувате места за кои отсекогаш сте сонувале. Очигледно не го зборувате локалниот јазик доволно добро за да се разберете. Што ако се изгубите некаде и не знаете каде сте? Бидејќи не го знаете локалниот јазик, нема да имате средства да комуницирате за да го пронајдете патот за излез. Во такви ситуации, може да зависите од мапа што претставува еден вид визуелна содржина.
Визуелната комуникација е начин со кој луѓето можат лесно да ги разберат работите. Нека бидат знаци, типографија, филмови, графички дизајни и безброј други примери. Пред да се насочиме кон тоа како визуелната комуникација помага во маркетингот со содржини, да се запознаеме со визуелната писменост.
Децата можат да разберат слики пред да сфатат вербални вештини. Слично на тоа, визуелната писменост игра важна улога во толкувањето на пораката во форма на уметност и визуелни медиуми. Интернетот има огромно значење за визуелната писменост.
Визуелната комуникација е случува насекаде – веб-страници, весници, упатства за употреба, социјални медиуми и е-пошта. Употребата на визуелна уметност ќе ја најдете насекаде.
– Чувство на пријатност и уживање
Визуелните материјали се дефинитивно позабавни. Доколку станува збор за уметничка визуелизацијата тогаш таа носи и естетско уживање. Комична слика ги тера луѓето да се насмевнат и ќе помогне за подолго задржување на информацијата, ќе понесат со себе чувство на пријатност и задоволство.
2. Важноста на визуелната комуникација во бизнисот
Комуникацијата е моќ и таа е столбот на сите сфери во животот. Во бизнис светот, квалитетната визуелна комуникација е клучот за успех и за зајакнување на маркетинг активностите. Визуелната комуникација ја поседува најсилната моќ – да ја пренесе бренд приказната успешно и точно.
За секој бизнис е многу важно пораката што сака да ја пренесе да биде протолкувана на ист или барем сличен начин од што е можно поголем број од примателите на таа порака. Во спротивно, сите напори што ќе ги вложите ќе бидат погрешни. Визуелната комуникација го премостува јазот. Краток и едноставен анимиран GIF или видео може да пренесе јасна и унифицирана порака, која помага потрошувачите на сликовит начин да добијат соодветни информации за производот, услугата, брендот, компанијата.
Визуелната комуникација нуди лесен начин на носење одлука во деловниот свет. Овозможува лесно и брзо пренесување на информациите. Таа помага клиентот да донесе ефикасна и брза одлука за вашиот производ. Таа зборува за вашиот бизнис многу погласно од зборовите. Добриот дизајн продава, но во комбинација со квалитетен производ испишува успешна бизнис приказна.
3. Зошто визуелната комуникација е поважна од кога било?
Имам чувство дека технологијата и податоците ја ставија на страна креативноста во визуелната комуникација, а слободно можам да констатирам дека се забележува отсуство на креативност во секоја сфера од маркетингот. Токму креативноста е суштинска и претставува еден од поважните аспекти во маркетингот.
Креативната визуелна комуникација е можеби клуч со кој ќе се издвојат успешните приказни на пазарот. Таа ќе создаде емотивна и долготрајна врска помеѓу брендот и последниот купувач.
Во време во кое исклучително многу се зборува за дигитализација и кога целиот свет комуницира online, особено е важно со какви слики комуницираме. Квалитетната и креативна визуелизација ќе му донесе долготраен бенефит на вашиот бренд.
Бојата ѝ дава живот на намерата. Таа има посебно влијание врз емоциите на човекот. Нејзината важност е огромна. Затоа е неопходно да научиме да комуницираме со нијанси. Изборот на бои е фундаментален, не само во уметноста или графиката, туку и во психологијата и маркетингот. Всушност, бојата е еден од најважните елементи на композицијата, било да е тоа сликарство, фотографија, филм или дизајн.
Тоа е така затоа што бојата има моќ да насочи мисла, да менува активности, да предизвика позитивни и негативни реакции, да привлече внимание, дури и да го промени расположението. Во крајна линија, може да влијае на одлуката на потрошувачите дали ќе купат одреден производ или не.
Создавањето визуелно решение што ќе трае е процес за кој треба време, слобода, знаење и креативност, познавање на бојата и нејзиното значење. Психологијата на бојата има големо влијание врз донесените одлуки, и свесно и несвесно. Бојата во визуелната комуникација е една поширока тема, која ќе ја отвориме во некоја следна прилика.
На крај, да не заборавиме неколку важни елементи кои мора да ги имате предвид при носењето одлуки:
- Квалитетната визуелна комуникација е клучна за вашиот бренд или производ;
- Визуелизацијата во моментов игра важна и голема улога во создавањето цврста врска помеѓу вас и вашите потрошувачи;
- Храброста ги следи успешните – охрабрете се за креативна и уникатна визуелна приказна;
- Многу е важно кој ја креира вашата визуелна приказна. Затоа не штедете на визуелизацијата. Таа е првата слика за вашиот бренд.
P.S. На крај, само да прашам, кои шпагети ги одбравте?
The post Колумна на Софија Семенпеева: „Визуелна комуникација – моќта на успешните брендови!“ appeared first on Marketing365.
